Cando a crise social da actual pandemia impactou no Sistema de Servizos Sociais, en marzo de 2020, estes encontrábanse xa enfraquecidos por motivos previos a este andazo, os cales nada tiñan que ver coas necesidades da cidadanía. Este texto consiste nunha sistematización de apuntamentos sobre o colapso do Sistema, e as consecuencias deste, por conta da actual covid. A continuación, establecemos os alicerces do que entendemos debera ser un Novo Plano de Emerxencia Social para tratar, por último, do necesario Pacto de Reconstrución dos Servizos Sociais. Entendemos que o Sistema Público de Servizos Sociais debe tomar conta da crise social do mesmo xeito que a Sanidade tomou conta dos efectos da crise sanitaria.